शनिबार, १० फागुन २०७६
Sat, 2020-02-22
Open Nav

२० सर्जकका २० चोटिला मुक्तकहरु

२२ बैशाख २०७६, आईतवार २० सर्जकका २० चोटिला मुक्तकहरु

मुक्तक -१

हरेक काममा गल्ती गरें, रोष यही छ मनको
तर गलत काम गरिनँ, सन्तोष यही छ मनको
गलत यहाँ कोही छैन, गल्ती कसैको पनि हैन
म मान्छे अलि ढिलो चिन्छु, दोष यही छ मनको !

– सुनिल अधिकारी
काठमाण्डौं

…………………………………………………………….

मुक्तक -२

मेरो अन्तिम क्षणमा कोही मलामी गनेर फर्किन्छन्
यही बेलामा नाता,आफ्नो र अर्को बनेर चर्किन्छन्
मलाई सम्झेर मुर्छित भैं भुइँमा ढल्ने तिमी मात्र हौ
धेरै साथीहरु त हार्दिक श्रद्धान्जली भनेर तर्किन्छन् ।

– प्रकाश पाठक “योगी”
चितवन

…………………………………………………………….

मुक्तक -३

तिम्ले गर्यौ बर्बाद मलाई, कर्म मेरो खाेटी होइन
गल्ती गर्दा माफी दिएँ, मात्र एकचाेटी होइन
मलाई पनि दुख्छ होला, भावनामा खेलिदिँदा
मुटु हो यो मुटु मेरो, तिम्रो खेलको गाेटी होइन !:

-निलञ्जला भारद्वाज
काठमाण्डौं ।

…………………………………………………………….

मुक्तक -४
(तीन अनुप्रासीय मुक्तक)

धन्सारमा भएदेखि, नून चलाउन गाह्रो छैन
संसारमा ‘नून’ले चले, गुन फलाउन गाह्रो छैन
‘गुन’लगाइ चल्न जाने, नीतिनियम छल्न जाने
भन्सारमा जोसुकै हुन, सुन छलाउन गाह्रो छैन ।

– गोम बिक्रम
तानसेन, पाल्पा ।

…………………………………………………………….

मुक्तक -५

कति लुटपाट भयो कति झडप भयो आँखै अगाडी
कलकारखाना एकाएक ठप भयो आँखै अगाडी
राजनैतिक दलहरु उता प्रतिस्पर्धामा लडिरहँदा
यता जनताको रगत तपतप भयो आँखै अगाडी

– राजन”रोचक”

…………………………………………………………….

मुक्तक -६

छरपष्ट बन्दा पनि…एउटै कथा बन्यो जीवन
हजार पटक गन्दा पनि एउटै कथा बन्यो जीवन
उनीसँगै जोडिएछ…यात्रा मेरो जिन्दगीको
अलग पारौं भन्दा पनि एउटै कथा बन्यो जीवन ।

– छिमेकी दाइ
मोरङ्ग

…………………………….

मुक्तक -७

प्रेमको पगरी छामी भावनामा खेल्ने हत्यारा थिए
हरेक खुड्कोमा खुट्टा तान्ने उनै दुश्मन प्यारा थिए
आधा पिउँदा पिउँदै आधा जिउन सिकेको मान्छे
एक हरफ जिन्दगीमा कैयौं अक्षर अप्ठ्यारा थिए ।

यो पनि पढ्नुहोस :   दोषी नजर (कथा) - मानुषी रेग्मी

– दयाराम शर्मा
नवलपरासी
हाल : कञ्चनपुर

…………………………………………………………….

मुक्तक -८

आफ्नो बारीमा कोदालोमा माटो थुपारी- तान्छु बाबा
गल्ती भई दियो यदि भने पनि सुधारी- मान्छु बाबा
जे जे फल छ गाउँघरको ताजा अन्न बालीहरू,
साँझ बिहानीको छाकमा सधै उमारी -खान्छु बाबा !!

– डि.पी. भावुक छत्कुली
धादिङ ।

…………………………………………………………….

मुक्तक -९

भूगोल नाप्न सकिएला, मन नाप्न सकिएन
घर पोलेर तिम्रो निम्ति, आगो ताप्न सकिएन
सुखसँग राख्दा राख्दै, दु:ख खोज्न मुन्टिनेलाई,
रामराम भन्न सकिने भो, काँध थाप्न सकिएन ।

– कृष्ण न्यौपाने
चितवन ।

…………………………………………………………….

मुक्तक -१०

पोहोर मात्रै देखेको हुँ, खरको छानो
थियो तपतप चुहिरहेको, घरको छानो
छ महिना के बसेथ्यो, बालुवाटारमा
यसपाली त थपिएछौ, अर्को छानो ।

– मंगोलियन सम्राट
धादिङ्ग
हाल : साउदी अरब ।

…………………………………………………………….

मुक्तक -११

जनताले चाहे अनुसार हामी चलाउँछौँ
बालुवाटार सिंहदरबार हामी चलाउँछौँ
निदाएर बस्नु भन्दा तेल हाली कानमा
छोड बरु हाम्रो सरकार हामी चलाउँछौँ

– गणेश प्रसाद खतिवडा
सोलुखुम्बु ।

…………………………………………………………….

मुक्तक -१२

सिमानामा गोली चलिरह्यो, सरकार सुनेर बस्यो
देशको भन्दा अाफ्नै फाइदाका, जाल बुनेर बस्यो
रेडियो समाचार दिदैछ, सीमा सुरक्षार्थ जनता मरे
नालायक सरकार के सुन्थ्यो, कान थुनेर बस्यो ।

– खगेन्द्र समरस
चितवन

…………………………………………………………….

मुक्तक -१३

सहेर व्यथा तिमीले आज संसार देखायौ आमा
छोपेर लाज आँचल भित्र अमृत पिलायौ आमा
पहिलो ताते त्यो”तोते बोली देखेरै थकाई मेट्यौ
भुलेर पीर दुःखमा हाँस्दै जिउन सिकायौ आमा !!

– मेनुका थापा
बिर्तामोड, झापा

…………………………………………………………….

मुक्तक -१४

बस्ती बिर्सिएछ अनि घर बिर्सिएछ
अथाह मनभित्रका रहर बिर्सिएछ
हद भन्दा धेरै खुड्किला चढ्न खोज्दा
पैतालाले हिँड्नुपर्ने सफर बिर्सिएछ ।

– दिनेश न्यौपाने
कैलाली ।

…………………………………………….

मुक्तक -१५

जिन्दगीको संघर्ष बिचमै हारेछु भने
गाउँ छोडी अन्तै बसाइँ सारेछु भने
प्रियाको बाध्यता बुझ है प्रिय तिम्ले
यदि तिम्रो चोखो माया मारेछु भने !!

यो पनि पढ्नुहोस :   गजल -अरुणा श्रेष्ठ

– उमा पगेनी `दीप´
चितवन ।

मुक्तक -१६

अाफ्नै बनाऊँ सोच्दा पराई बनेर जान्छ
बर्षौं गर्नुस् यो संघर्ष तथापि खेर जान्छ
दूध पिलाई भगवान सम्झे पनि सर्पलाई
सर्प सर्प नै हुन्छ एकदिन डसेर जान्छ ।

-खड्का जगत दोलखाली
दोलखा ।

……………………………………………………………

मुक्तक -१७

शत्रु जति दंग पर्छन् मेरो मुस्कान देख्दा
त्यसैपनि आँखा तर्छन् मेरो मुस्कान देख्दा
पीडाभित्र हाँसी दिन्छु जलाइदिन्छु तिन्लाई
जली जली कति मर्छन् मेरो मुस्कान देख्दा ।

– शारदा पौडेल
चितवन

……………………………………………………

मुक्तक -१८

टेक्ने धर्ती ओढ्ने आकाश आधा- आधा बाँडौं
एक अर्काको खुशी,उदास आधा – आधा बाँडौं
जन्म फरक भए पनि मृत्युसँगै बोलाउँला
जीवन धान्ने मुठ्ठी सास आधा – आधा बाडौं

– सफल गोले तामाङ
रामेछाप ।

………………………………………

मुक्तक -१९

बन्द हड्ताल उस्तै छ अझै चक्काजाम उस्तै छ
विकृति विसंगति अनि कु-संस्कार तमाम उस्तै छ
कस्ले विकास गर्यो भन्नु,कुन सरकार गतिलो ठान्नु ?
बझाङ्ग उस्तै छ अझैसम्म डोटी,अछाम उस्तै छ

– राजेन्द्र उपाध्याय
बझाङ्ग ।

…………………………………………………………………

मुक्तक -२०

अभावले यो दुनियाँमा, कति मान्छे रून्छन् होला
सम्पत्तिले बहुलाउने चाही, थोरै मात्र हुन्छन् होला
दम्भ, स्वार्थ, कुसंस्कारमा, पुरै मुलुक फसी सक्यो
पिडितका चित्कारहरू, अब कसैले सुन्छन् होला ।

– राजेश खोटाङ्गे
खोटाङ्ग ।

( – यी सबै मुक्तकहरु साहित्यकार गोम बिक्रमले संकलन गर्नु भएको हो ।नेप्लिज डायस्पोरा पत्रकार सतिश चापागाईंको सम्पादकत्वमा अमेरिकाबाट संचालन हुने अनलाइन हो । तपाई पनि नेप्लिज डायस्पोरामा साहित्यिक रचना पठाउन चाहनुहुन्छ भने गोम बिक्रमको फेसबुक (https://www।facebook।com/gom।bicram) मा सम्पर्क गर्नुहोला । नेप्लिज डायस्पोराको फेसबुक पेज https://www।facebook।com/nepalesediaspora/ लाइक गर्न र युट्युब च्यानल https://www।youtube।com/nepalesediaspora लाई सब्स्क्राइब पनि गर्नु होला। -सम्पादक )

Leave a Reply

Your email address will not be published. Required fields are marked *

हाम्रा सहकार्य