श्रमिकको जीवन सुधार्न

कार्ल मार्क्सले भनेका थिए–

"वस्तुको उत्पादन र न्यायोचित वितरण गरौँ।"

उत्पादन बढेपछि–

धन मिल्यो, शिक्षा मिल्यो।

दलितहरू धनी बन्दा

न जातभात रहन्थ्यो,

न कुनै विभाजनको खाडल!

सिर्जनशील मिजारहरू हुन्थे–

आफ्नै व्यवसायका कारण

नेपालकै सबैभन्दा धनी।

कालिगड विश्वकर्माहरू

देशका उत्कृष्ट वैज्ञानिक बन्थे,

र निर्माण हुन्थ्यो विकासको बलियो जग।

कल चलाउने साहिँलो दमाइ

मालिक हुन्थ्यो ठूला गार्मेन्टको,

सिउँथ्यो उसले फाटेका सम्बन्धहरू

र विश्वको कपडाको जिम्मा

उसैको काँधमा आउँथ्यो।

...

जसले दर्शन पढे–

ऊ कहिल्यै उस्तै रहेन।

कुनै दिन हेगल पढेपछि

कार्ल मार्क्स कार्ल मार्क्स मात्र रहेनन्,

लेनिनले जब मार्क्सवाद पढे

उनी केवल मार्क्सवादी रहेनन्,

जन्माए– लेनिनवाद!

माओत्सेतुङले जब सोचमग्न बनेर

मार्क्सवाद र लेनिनवाद पढे,

न उनी मार्क्सवादी रहे, न लेनिनवादी,

उनले बिर्से कण्ठ पढेका दर्शन

र जन्माए– माओवाद!

तर यहाँ,

मिसनरी डलर चाटेका

पुराना ढ्याउहरू बेला-बेला

डकार्दै चार हात उफ्रन्छन्

र स्वार्थको मन्त्र जप्दै भन्छन्–

"हामी क्रान्ति गर्छौँ!"

देशका तिनै विद्रूप छिद्रहरू

जप्दै छन् अझै जातीय नारा।

- हेलम्बु-६, सिन्धुपाल्चोक