मङ्सिर १८, पाल्पा । 

नेपाल पत्रकार महासंघका केन्द्रिय सचिव तथा उपन्यासकार सविन प्रियासनद्वारा लिखित उपन्यास 'नयाँ लुगा' को बिहीबार एक कार्यक्रमका बीच विमोचन गरिएको छ । राप्ती साहित्य परिषद् जिल्ला शाखा दाङको आयोजनामा गरिएको कार्यक्रममा प्रियासनको १३ औँ कृति अर्थात् 'नयाँ लुगा' उपन्यास सार्वजनिक गरिएको हो ।

नेपालकै सर्वाधिक दोस्रो धेरै उपन्यास प्रकाशित गर्नु भएका प्रियासनको यस वर्ष यो तेस्रो उपन्यास प्रकाशन भएको हो । प्रियासनका यस अगाडि कार्तिकमा 'कालो मन' र अषाढमा 'कडी' उपन्यास सार्वजनिक भएको थियो ।

परिषदका अध्यक्ष यम रेग्मीको अध्यक्षता तथा परिषदका पूर्व अध्यक्ष तथा सल्लाहकार पुरुषोत्तम खनालको प्रमुख आतिथ्यता एव परिषदकै सल्लाहकार पद्मप्रसाद शर्माको विशिष्ट आतिथ्यतामा कार्यक्रम भएको हो ।

नेपालकै दोस्रो धेरै उपन्यास प्रकाशित गर्ने उपन्यासकारका रूपमा पहिचान बनाउनु भएका प्रियासनको कृतिको विमोचनसँगै विभिन्न क्षेत्रमा उल्लेखनीय उपलब्धी हासिल गरेका दुई युवा प्रतिभालाई पनि सम्मान गरिएको थियो ।

त्यसैगरी कार्यक्रममा 'घोराही बनाऔं' अभियानको तर्फबाट सामुदायिक विद्यालयबाट चिकित्सा शिक्षा आयोगले लिएको परीक्षामा उत्तीर्ण हुँदै पूर्ण छात्रवृत्तिमा नाम निकाल्न सफल घोराही–१० की रोशनी घर्ती मगर र राजपुर निवासी बबई गाउँपालिकाकी सरस्वती आधारभूत विद्यालय जलजलामा २० वर्षको उमेरमा प्रधानाध्यापक बन्नुभएकी रक्षाकुमारी यादवलाई उहाँहरूको योगदानको कदर गर्दै सम्मान गरिएको थियो ।

कार्यक्रममा बोल्दै प्रमुख अतिथि खनालले साहित्यको क्षेत्रमा पुर्याएको योगदानको चर्चा गर्दै अझ राम्रो र उत्कृष्ट रचना ल्याउन सुझाव दिनुभयो । उहाँले पाठकको रोजाइमा पर्न सक्ने पुस्तक ल्याउनुपर्ने कुरा बताउनु भयो । सो अवसरमा बोल्ने वक्ताहरूले प्रियासन लगायतका उपन्यासकारहरूका कारण उपन्यास लेखनमा दाङ बलियो स्थानमा उक्लिएको बताउनु भएको थियो । वक्ताहरूले प्रियासनलाई नेपालकै पहिलो बन्न सुझाव दिँदै खँदिलो, ओजिलो विषयवस्तुमा पनि उपन्यास प्रकाशित गर्न अनुरोध गरेका थिए । सो अवसरमा बोल्दै उपन्यासकार प्रियासनले अबको पाँच वर्षभित्रमा नेपालकै पहिलो धेरै उपन्यास प्रकाशित गर्ने उपन्यासकार बन्ने उद्घोष गर्नुभएको थियो ।

कार्यक्रममा पुस्तकका बारेमा लेखक सविन प्रियासनले प्रकाश पार्नुभएको थियो भने विशिष्ट अतिथि पद्मप्रसाद शर्मा, पत्रकार महासंघ दाङका पूर्व अध्यक्ष डा.सुदीप गौतम लगायतले शुभकामना मन्तव्य राख्नुभएको थियो ।

परिषद्का सुरेशकुमार पाण्डेको स्वागत मन्तव्यबाट सुरु भएको कार्यक्रमको सहजीकरण राप्ती साहित्य परिषदका जिल्ला सचिव घनश्याम के.सी.ले गर्नुभएको थियो ।