सतिश चापागाईं बाल्टिमोर/अमेरिका साहित्यकार कृसु क्षेत्रीको शब्द, गायक रामकृष्ण ढकालको स्वर र हिमाल सागरको संगीत रहेको एउटा अब्बल गीतले अन्तराष्ट्रिय पहिचान बनाउन सफल भएको छ । ‘अचेल पाइलै पिच्छे’ भन्ने गीत अमेरिकाको न्यूजर्सीमा आयोजना भइराखेको गोल्डेन डोर इन्टरनेसनल फिल्म फेस्टिवल अफ जर्सी सिटी नामक अन्तर्राष्ट्रिय चलचित्र महोत्सवका लागि चयन भएपछी यसको चर्चा चुलिएको हो र पहिचान फराकिलो भएको हो । महोत्सवमा यो गीतसँगै झन्नै ९२ मुलुकका अन्य म्युजिक भिडियोहरु छानिएका छन् । नेपालबाट यो म्युजिक भिडियो मात्र चयनमा परेको हो । यो गीतका तिनै जना स्रष्टाहरु नेपालका चर्चित व्यक्तित्वहरु हुन् । शब्द रचना गर्ने कृसु क्षेत्री चर्चित साहित्यकार हुन् । उनी अमेरिकाको न्युयोर्कमा रहेको दुताबासमा नेपाल सरकारका महाबाणिज्य दुत हुन् । रामकृष्ण ढकाल नेपालका पहिलो नम्बरका आधुनिक गायक हुन् । हिमाल सागर पनि चर्चित गायक तथा संगीतकार हुन् । हालै साझा प्रकाशनबाट ‘चराको गीत’ नामक चर्चित कविता संग्रह प्रकाशन गरेका चर्चित साहित्यकार कृसु क्षेत्रीको पुरानो गजललाई आधुनिक संगीतको स्वादमा तयार गरिएको हो । उक्त म्युजिक भिडियोको निर्देशन युवा निर्देशक बिक्की पुलामीले गरेका छन् । यस चयनले आफु अत्यन्त खुशी भएको अमेरिका-क्यानडाको सांगीतिक भ्रमणमा रहेका गायक रामकृष्ण ढकालले बताए । "भर्खर रचनाकार कृसु क्षेत्रीसंग कुरा भयो । उहाँ झन् धेरै खुशी हुनु भएको छ । हाम्रो गीत संगीतले अन्तराष्ट्रिय पहिचान बनाउन सफल भएकोमा हामी पुरै टिम खुशी छौं ।" अमेरिकाको न्युयोर्कमा रहेका गायक ढकालले नेप्लिज डायस्पोरासंग खुशी साटासाट गरे । मानवीय जीवनको सफलता असफलता आरोह अवरोहलाई उल्लेख गरिएको यो गीत सुगम संगीतका श्रोताहरुले निकै रुचाएको समेत पाइएको छ । आगामी २० सेप्टेम्बरदेखि २३ सेप्टेम्बर सम्म चल्ने यो प्रतियोगितामा रामकृष्ण ढकालको गीत सम्मानित भएमा अन्तर्राष्ट्रिय सम्मान पाउने पहिलो नेपाली म्युजिक भिडियोसमेत हुने छ । आफ्नो म्युजिक भिडियो चयन भएकोमा युवा निर्देशक बिक्की पुलामीले हर्षित हुँदै आफूलाई अत्यन्त गर्वको अनुभूति भएको र यो भिडियो अन्तर्राष्ट्रिय सम्मानबाट पुरस्कृत हुने आशा समेत रहेको बताए । रामकृष्ण ढकालले गाएको उक्त गीतको म्यजिक भिडियोको लिंक यहाँ प्रस्तुत छ । https://youtu.be/Z3LgmrlEeek