मोरक्कोमा गएको शक्तिशाली भूकम्पमा परी मृत्यु हुनेको सँख्या झन बढ्न थालेको छ । शुक्रबारसम्म भूकम्पमा परेर मर्नेको सख्या २००० नाघेको छ । यतिमात्र होइन करिव १८०० जना घाइते छन् भने धेरैको अवस्था चिन्ताजनक रहेको बताइएको छ ।  

शुक्रबार राति ११ः११ बजे गएको ६.८ म्याग्निच्युडको भूकम्पमा ज्यान गुमाउने र घाइते हुने आधाभन्दा बढी अल–हौज र ताराउदान्ट प्रान्तका छन् । उक्त मन्त्रालयले मराकेस, अगादिर, कासाब्लांका, और्जाजाटे, चिचौवा, अजिलाल र युसुफिया पनि अधिक प्रभावित भएका जनाएको छ ।

शक्तिशाली भूकम्पपछि साना–साना धेरै धक्का आज पनि महसुस गरिएको मोरक्कोका सञ्चारमाध्यमले जनाएका छन् । शुक्रबारको भूकम्प देशमा अहिलेसम्मकै सबैभन्दा शक्तिशाली भएको उल्लेख छ ।

अहिले पनि अधिकांश घरबाहिर त्रिपाल टाँगेर बसिरहेका छन् । देशको एकतिहाइ भूभाग भूकम्पबाट प्रभावित भएकाले ज्यान गुमाउने र घाइते हुनेको संख्या अझै बढ्न सक्ने सरकारी अधिकारीको अनुमान छ । भूकम्पले नराम्ररी प्रभावित पर्वतीय क्षेत्रमा रहेका दुर्गम गाउँमा निकै कठिनाइ भएको छ । 

यसैबिच राष्ट्रिय फुटबल टीमले घाइतेको सहयोगका लागि रक्तदान गरेका छन् ।