पाल्पा, २३ पौष २०८१ । आनन्दआश्रम ज्ञान केन्द्र‚ आँधीखोलामा आमा कवितासंग्रहको भव्य समारोहका बीच विमोचन भएको छ ।
फापरथुम‚ स्याङ्जाको आनन्द भवनमा मासिक रूपमा नियमित सञ्चालन हुँदै आएको‚ साहित्यिक तथा वैचारिक गोष्ठीको २३ सौँ अध्यायमा सार्वजनिक गरिएको उक्त कवितासंग्रह सूर्य जि.टी.‚ विनिता जि.टी.‚ सविन जि.टी. र सचिन जि.टी.ले मिलीजुली सिर्जना गर्नु भएको हो ।
आनन्दआश्रम ज्ञान केन्द्रद्वारा आयोजित उक्त समारोहको सभापतित्त्व संस्थाका सल्लाहकार जगन्नाथ सापकोटाले गर्नु भएको थियो भने सदस्य ख्यामनारायण न्यौपानेले स्वागत मन्तव्य प्रस्तुत गर्नुभएको थियो ।
कार्यक्रममा प्रमुख अतिथि कवि चिन्तु गिरीले, " मानिसको मृत्यु हुन्छ । जन्मेजति सबैको मरण हुन्छ । यो प्राकृतिक नियम हो । सिर्जनाले मात्र मानिसलाई अमर बनाउँछ । शारीरिक रूपमा हामीसँग नभए पनि सिर्जना र सिर्जनाकारहरू पुस्तौं पुस्तासम्म हाम्रो मनमुटुमा जीवित रहन्छन् । " भन्नुभयो ।
कवितासंग्रह र त्यसमा समावेश भएका कविताहरूमाथि विवेचना गर्ने काम कवि तथा त्रिभुवन विश्वविद्यालयका सहप्राध्यापक हिमलाल पुरीले गर्नु भएको थियो । साथमा सिर्जनाकारहरूलाई बधाई ज्ञापन गरी उत्तरोत्तर प्रगतिको कामना गर्नेमा संस्थाका संस्थापक संरक्षक त्रिलोचन ढकाल‚ देवी सापकोटा‚ वडा सदस्य लक्ष्मीदाश गहतराज र जीवन ढकाल‚ त्रि.वि.वि.का सहप्राध्यापक शारदा शर्मा‚ डा. ऋषिराम ढकाल र टिकाराम नेपाली आदि हुनुहुन्थ्यो । उक्त काव्यगोष्ठीमा देवी सापकोटा‚ लक्ष्मीदाश गहतराज र सविन जि.टी.ले सारगर्भित कविताहरू वाचन गर्नु भएको थियो ।
सर्जक सूर्य जि.टी. र सबिन जि.टी.ले कविताहरूसमेत पढ्दै कवितासंग्रहको रचना र प्रकाशनका सम्बन्धमा मन्तव्य दिनु भएको थियो । साथमा आनन्दआश्रम ज्ञान केन्द्रले‚ पुस्तक प्रकाशन गरेर सार्वजनिक गर्नु भएकोमा हार्दिक बधाई दिँदै रचनाकारहरू चारैजनालाई मञ्चमा सम्मान गरेको थियो ।
कार्यक्रमको सञ्चालन संस्थाका सचिव दोलराज ढकालले गर्नुभएको थियो । यसरी नियमित कार्यक्रमले विभिन्न साहित्यकारहरूलाई भेट हुने, अन्तर्क्रिया र विमोचन लगायत विभिन्न अवसर जुराएकोमा सबैले आश्रमलाई हृदयबाटै धन्यवाद दिनु भएको थियो ।
