पाल्पा, असार २७ गते ।
आफ्नो मौलिक लोक-लय र सरल नेपाली भाषाका माध्यमबाट नेपाली वाङ्मयलाई एकीकृत गर्ने आदिकवि भानुभक्त आचार्यको २१३ औं जन्मजयन्ती पाल्पामा भव्य रूपमा मनाइएको छ । प्रगतिशील लेखक संघ (प्रलेस) नेपाल, पाल्पाको आयोजनामा तानसेनस्थित देववाणी माविको हलमा असार २७ गते एक विशेष सिर्जना वाचन कार्यक्रम सम्पन्न भएको हो ।
प्रलेस पाल्पाका अध्यक्ष धातानन्द शर्माको अध्यक्षतामा सम्पन्न उक्त साहित्यिक जमघटमा प्रलेसका केन्द्रीय सदस्य रामप्रसाद अर्याल प्रमुख अतिथि हुनुहुन्थ्यो भने पाल्पा साहित्य समाजका अध्यक्ष पुष्कर अथक रेग्मी विशिष्ट अतिथिका रूपमा उपस्थित हुनुहुन्थ्यो ।
कार्यक्रममा आदिकवि भानुभक्त आचार्यको साहित्यिक एवं भाषिक योगदानमाथि प्रकाश पारिएको थियो । प्रमुख अतिथि रामप्रसाद अर्यालले भानुभक्तले नेपाली भाषालाई जनस्तरमा पुर्याउन खेलेको भूमिका अतुलनीय रहेको बताउनुभयो । यस्तै, विशिष्ट अतिथि पुष्कर अथक रेग्मी लगायतका वक्ताहरूले भानुभक्तको स्मृतिमा गरिने यस्ता सिर्जनात्मक कार्यक्रमले मोफसलको साहित्यलाई ऊर्जा दिने विश्वास व्यक्त गर्नुभयो ।
कार्यक्रममा कवितादेखि गजलसम्म कार्यक्रमको मुख्य आकर्षण स्रष्टाहरूको सिर्जना वाचन रह्यो । डेढ दर्जन बढी साहित्यिक व्यक्तित्वहरूको उपस्थिति रहेको उक्त कार्यक्रममा विभिन्न स्रष्टाहरूले आ-आफ्ना ओजिला सिर्जनाहरू यसरी प्रस्तुत गर्नुभएको थियो ।
कार्यक्रममा कविहरू दिपेश ज्ञवाली, तेजनारायण ढकाल, अनिल किशोर घिमिरे, विशाल दर्लामी, गोविन्द खनाल, महेन्द्र पन्थी र कवयित्री इन्दिरा देवकोटाले समसामयिक र प्रगतिशील चेतले भरिएका कविताहरू प्रस्तुत गर्नुभयो । त्यसैगरी अमर भाटले गजल सीताराम घिमिरे र गोमविक्रमले चोटिला मुक्तकहरू प्रस्तुत गर्नुभएको थियो भने डा. शंकरप्रसाद गैरेले कविता र गजल दुवै विधाका स्वादिलो प्रस्तुति राख्नुभएको थियो ।
साहित्यकार रोहितप्रसाद ज्ञवालीले 'गुलेली कविता' मार्फत समाजका विकृतिमाथि प्रहार गर्नुभयो । सूर्यप्रसाद न्यौपानेले शुभकामनासँगै समसामयिक विषयको निबन्ध प्रस्तुत गर्नुभयो भने राजेन्द्र गोपाल सिंहले शुभकामना सहित कविता वाचन गर्नुभयो ।
विशिष्ट अतिथि पुष्कर अथक रेग्मीले शुभकामना दिँदै आफ्ना लोकप्रिय 'शीत कविता' तथा प्रमुख अतिथि रामप्रसाद अर्यालले भानुभक्तको व्यक्तित्वमाथि चर्चा गर्दै चोटिलो व्यङ्ग्य कविता प्रस्तुत गर्नुभयो ।
कार्यक्रमको समापन गर्दै प्रलेस पाल्पाका अध्यक्ष धातानन्द शर्माले भानुभक्तप्रति श्रद्धाञ्जली अर्पण गर्दै आदिकवि कृत रामायणको 'सुन्दर काण्ड' का केही अंशहरू लयदार रूपमा वाचन गरेर सुनाउनुभएको थियो । उहाँले उपस्थित सम्पूर्ण स्रष्टा तथा साहित्यप्रेमीहरूलाई धन्यवाद दिँदै कार्यक्रम समापन गर्नुभयो ।
गहन र रोचक बनेको उक्त कार्यक्रमको सञ्चालन कवि आर.बि. निश्चलले गर्नुभएको थियो ।
.png)
