मलेसियामा विषाक्त रक्सीका कारण बिरामी परेको भनिएकाहरुले कडा रक्सी पिएको त्यहाँको स्वास्थ्य मन्त्रालयले जनाएको छ ।   मलेसियाका स्वास्थ्य विभागका निर्देशक डाक्टर नूर हिशाम अब्दुल्लाहका अनुसार त्यहाँको स्वास्थ्य विभाग र प्रदेशले गरेको अनुसन्धानमा बिरामीले क्वालालम्पुर सेलांगोर क्षेत्रबाट लामो समयदेखि कडा खालको रक्सी किनेको खुलाशा भएको छ ।   बिरामीको शरीरबाट निकालिएको रक्सीको नमुना बजारमा पाइने रक्सीको नमुनाको टेष्ट हुने उनले बताएका छन् ।   बिरामीहरुबाट लिइएको जानकारीअनुसार उनीहरुले तीनवटा ब्राण्डका रक्सी किनेका थिए । मण्डले ह्विस्की, किंगफिसर बियर र ग्राण्ड रोयल ह्विस्की उनीहरुले स्थानीय बजारबाट किनेका हुन् । स्थानीय कारखानाहरुमा काम गर्ने विभिन्न देशका मजदुरहरुले सोमबार सार्वजनिक बिदा भएकाले खाने पिउने गरेको बताइएको छ ।   डाक्टर नूरका अनुसार बिरामीहरुलाई ‘मेथानोल पोइजनिङ’ भएको र पेट दुख्ने, वान्ता हुने, टाउको दुख्ने, रिँगटा लाग्ने तथा श्वासप्रश्वासमा समस्या देखिनेलगायतका लक्षणहरु देखा परेको छ ।   मलेसियाको स्वास्थ्य मन्त्रालयका अनुसार मंगलबार बेलुकासम्म बिरामी पर्नेको संख्या ५१ पुगेको छ । बिरामीमध्ये तीन जना मलेसियाली नागरिक छन् भने बाँकी नेपाल, म्यानमार, बंगलादेश र इन्डियाका नागरिक रहेका छन् ।   डाक्टर नूरका अनुसार अहिलेसम्म मृत्यु हुनेको संख्या १९ पुगेको छ । १४ जनाको अवस्था गम्भीर रहेको छ । मलेसियामा रहेको नेपाली दूतावासले जानकारी दिएअनुसार अहिलेसम्म चार जना नेपाली नागरिकको मृत्यु भएको पुष्टि भएको छ । मलेसियाका लागि नेपाली राजदूत कुमारराज खरेलका अनुसार सञ्जय उराव र विशाल बुढाथोकीको सनाखत भएको छ ।   त्यस्तै धादिङ विषाक्त रक्सी सेवनका कारण ज्यान गुमाउनेमध्ये एक धादिङका विकास घले भएको पुष्टी भएको छ । गंगाजमुना गाउँपालिका वडा नं। ६ बसेरीका २४ वर्षीय घलेको ज्यान गएको भन्ने खबर आएको उनका परिवारले जनाएका छन् ।   मलेसियाली प्रहरीले ती रक्सीमा के कस्तो विषाक्त पदार्थ थियो भन्ने विषयमा अनुसन्धान गरिरहेको छ । -द स्टार डटकम र उज्यालोको सहयोगमा