काठमाडौं । भारतको मुम्बइमा बन्धक बनाइएका एक नेपाली युवालाई मुम्बइमा लामो समयदेखि सामाजिक काममा सक्रिय नेपाली युवा समाजसेवी सागर भण्डारीले उद्धार गर्नु भएको छ ।
उहाँले गुल्मीको मुसिकोट नगरपालिका ३, तोलादीका सुमन खत्रीलाई मुम्बइको एक होटलबाट उद्धार गरेर घर पठाउनु भएको हो ।
होटलमा काम गर्ने क्रममा होटललाई क्षती गराएको भन्दै होटल सञ्चालकले झण्डै चार महिनादेखि बन्धक बनाएको थाहा पाएपछि खत्रीलाई होटलमै गएर उद्धार गरेको समाजसेवी भण्डारीले जानकारी दिनुभयो । स्थानीय प्रशासन र भिमराज गहिरे लगायतका साथीहरुको सहयोगमा खत्रीलाई उद्धार गरेर घर पठाएको भण्डारीले बताउनु भयो ।
झण्डै ७ लाख बराबरको क्षती बनाएकाले पैसा नतिर्दासम्म घर जान नदिने भन्दै होटल सञ्चालकले थुनेपछि खत्रीलाई मानसिक समस्या समेत भएको उनका आफन्तहरुले बताएका थिए ।
खत्रीका आफन्त र जापानमा रहेका उनका बाबु आमाको आग्रहमा समाजसेवी भण्डारीले खत्रीलाई उद्धार गरिदिनु भएको हो । आफ्नो छोरालाई उद्धार गर्न समाजसेवी भण्डारीलाई खत्रीका बाबु आमाले जापानबाटै पत्र पठाउनु भएको थियो ।
नवलपरासीको अरुण खोलाका स्थायी बासिन्दा समाजसेवी भण्डारीले लामो समयदेखि मुम्बइमा रहेर नेपालीहरुलाई सहयोग तथा उद्धार गर्ने कार्य गर्दै आउनु भएको छ । रोजगारीका लागि मुम्बइमा बस्नु भएका भण्डारीले कोरोना महामारीका बेलामा पनि धेरैलाई घर पठाउने र खाद्यान्नको व्यवस्था गरिदिने गर्नु भएको थियो ।
