अमेरिकामा नेपाली यूवा ह्यारी भण्डारीले अमेरिकी कंग्रेसमा उमेद्वारी दिने घोषणा गरेका छन् ।
मेरिल्याण्ड राज्यको २ नम्बर कंग्रेशनल डिष्ट्रिकबाट उनले उमेद्वारी दिने छन् । यहांका कंग्रेसम्यान डच रुपर्सबर्गले गत हप्ता मात्र आफूले पदबाट रिटायर्ड भएको घोषणा गरेका थिए ।
डेमोक्रेटिक पार्टीबाट विजयी भएका रुपर्सबर्गले रिटायर हुने घोषणा गरेलगत्तै सो पार्टीका नामुद नेताहरुले उक्त पदमा आफ्नो सपना बुन्न थालेका छन् ।
उमेद्वारी घोषणा गर्दै भण्डारीले आफूले नेपाली समुदायलाई धेरै सहयोग गरेको बताउदै यो समयमा समुदायबाट आफूले पनि सहयोग पाउने विश्वास व्यक्त गरेका छन् ।
नेपाली मूलका ह्यारी भण्डारीसंगै सोही पदमा बाल्टिमोर काउण्टिका काउण्टि एक्जुकेटिभ जोनी ओले पनि उमेद्वारीको घोषणा गरिसकेका छन् ।
ह्यारी भण्डारीले उमेद्वारी घोषणा गरेपछि अमेरिकाभरीका नेपालीहरुमा उत्साह थपिएको छ । भण्डारी अहिले मेरिल्याण्डको डिष्ट्रिक ८ बाट स्थानीय संसदमा सांसद छन् । यो उनको दोश्रो कार्यकाल हो ।
भण्डारीले कंग्रेसमा उठ्दै गर्दा उनको अहिलेको पदबाट राजिनामा गर्नुपर्दैन । जितेमा उनले अमेरिकी कंग्रेसमा प्रतिनिधित्व गर्नेछन् भने पराजित भएपनि उनको यो पद कायम नै रहने छ ।
