नेपाली क्रिकेट टिमले १० बर्षपनि टी-२० विश्वकपमा स्थान बनाउँदा यतिबेला सबै नेपालीमा खुसीको सिमा छैन । सन् २०१४ मा बंगलादेशमा भएको विश्वकप खेलेपछि नेपालले बारम्बार प्रयास गर्दापनि असफल भएको थियो । यो पटक घरेलु मैदानमा भएको एशिया छनोटमा शिर्ष दुईमा स्थान बनाउँदै नेपालले फेरी एकपटक विश्वकपमा स्थान बनाउन सफल भयो । तर यो पटक नेपाली टिमका लागि विश्वकपमा स्थान बनाउन घरेलु मैदान नै साक्षी बन्यो, त्यो पनि घरेलु दर्शकमाझ ।
नेपाल २०१६ को टि-२० विश्वकपको लागि २०१५ को ग्लोबल छनोटबाट नै बाहिरिएको थियो । त्यसपछि आइसिसीले टि-२० विश्वकप चार वर्षमा गर्ने जनाएको थियो । २०१९ को एसिया क्षेत्र छनोटबाटै नेपाल बाहिरिएको थियो । त्यसैले नेपालले २०२१ मा युएई र ओमानमा भएको विश्वकप खेल्न पाएको थिएन ।
२०२२ मा अष्ट्रेलियामा भएको टि-२० विश्वकपको लागि नेपाल ग्लोबल छनोट ए बाट बाहिरएको थियो । त्यो समय नेपाल युएईसँग सेमिफाइनलमा युएईसँग ६८ रनले हराउँदै विश्वकप खेल्न पाएको थिएन ।
१० बर्ष अगाडी विश्वकपमा स्थान बनाउँदाका ९८ प्रतिशत खेलाडी यो पटक मैदान बाहिर छन । कतिले सन्यास लिएका छन भने कति खेल छोडेर विदेश तिर र कोहि आफ्नो काममा नै ब्यस्त भएका छन । बंगलादेशमा विश्वकप खेल्दाका मुख्य बलर सोमपाल कामीमात्र यतिबेला टिममा रहेका छन । त्यो बेला नेपालले क्रिकेट खेलेको हेरेर हौसिएका रोहित पौडेलले यसपटक आफ्नो कप्तानीमा टीमलाई विश्वकपमा पुर्याएका छन ।
नेपालको यो सफलतामा यतिबेला सामाजिक सञ्जालमा टीमलाई बधाई दिनेको आइरो नै लागेको छ । क्रिकेटमा चासो राख्ने त छदैछन, क्रिकेट खासै फलो नगर्नेले पनि नेपालको यो सफलतामा रमाएका छन ।
१० बर्ष अगाडी नेपालले विश्वकप खेल्दा र अहिले क्रिकेटको परिस्थिती लगभग उस्तै छ । खेलाडीहरु अझैपनि आफ्नो भविष्यका बारेमा चिन्तित नै छन भने सरकारले क्रिकेटमा लगानी गर्न अझैपनि चासो दिएको छैन । फरक यतिमात्र भएको छ की त्यो बेला विश्वकप खेल्दा नेपालमा अन्तराष्ट्रिय स्तरको किर्तीपुर मैदानमात्र थियो भने अहिले मुलपानी मैदान थपिएको छ । बर्षोदेखि बनिरहेको यो मैदानमा यसपटक नेपाली क्रिकेट टिमले खेलेर विश्वकपमा स्थान बनाउन सफल भयो ।
बंगलादेशमा नेपालको कप्तानी गरेका पारस खड्का यसपटक क्यानको जिम्मेवार पद सचिवमा आएर यो खेललाई अगाडी बढाउने प्रयास गरिरहेका छन । क्यानको नयाँ कार्यसमिती आएसँगै पहिलो सफलता यो कार्यसमितीका लागि विश्वकपमा स्थान बनाउनु नै रहेको छ । त्यो बेला क्यानले खेलाडीका लागि केहि गर्न सकेन भनेर आवाज उठाएका पारस आफै जिम्मेवार पदमा पुग्दा अब उनले खेलाडीलाई कसरी राम्रो वाताबरण बनाउछन भन्नेमा सबैको चासो छ ।
यता सरकार भने अझैपनि मौखिकरुपमा ठिक्क र कामले दिक्क जस्तै नै छ । खेलाडीले पाउने पुरस्कार समयमा नदिने, भौतिक पुर्वाधारको विकाशमा ध्यान नदिने काम जारी नै छ । यता प्रतियोगिताका बेला निजि क्षेत्रबाट क्षणिक रुपमा पुरस्कारको घोषणा गर्ने काम जारी नै छ । त्यो बेलापनि खेलाडीका लागि विभिन्न निजि कम्पनीले पुरस्कारको घोषणाका साथै रोजगारी दिने भन्दै चर्चा कमाएका थिए । जुन यो पटकपनि जारी छ । यो बिचमा विभिन्न कम्पनीले पुरस्कारको घोषणा गरेर चर्चा पाएपनि र उनीहरुले रकम पनि दिएका छन । १० बर्षको बिचमा नेपालको सबै भन्दा ठूलो उपलब्धिका रुपमा नेपालले एसिया कप खेल्नु मान्न सकिन्छ । भारत र पाकिस्तानसँग पहिलो पटक खेलेर वाहवाही पाएको नेपालले त्यसलाई कम हुन नदिँदै विश्वकपमा स्थान बनाएको छ । जुन सबै नेपालीका लागि गौरवको बिषय हो ।
नेपालले घरेलु मैदानमा उत्कृष्ट खेलेर विश्वकपमा स्थान बनाउँदा हजारौं दर्शक मैदानमा पुगेर खुसी मनाउँदा त्यो भन्दा धेरैले टेलिभिजन सेटमा खेल हेरेर मज्जा लिए र खुसी मनाए ।
अब नेपालले वेष्ट इन्डिज र अमेरिकाको संयुक्त आयोजनामा हुने विश्वकप जुन २०२४ को जुलाईमा हुन गइरहेको छ, त्यो खेल्ने पक्का भएको छ । नेपाली क्रिकेट टिमलाई करिव ८ महिनाको समय बाँकी हुनेछ, विश्वकप खेल्नका लागि । यो बिचमा टिमको तयारी कसरी राम्रो गर्ने भन्ने मुख्य चुनौती क्यानलाई छ । २० देशले खेल्ने यो विश्वकपमा नेपाललाई राम्रो प्रदर्शन कसरी गराउने भन्ने चिन्ता अब खेलाडीलाई भन्दापनि क्यानलाई बढि हुनेछ ।
छिमेकी देश भारतमा भइरहेको एकदिवसिय विश्वकप खेलिरहेका अफगानिस्तान र नेदरल्याण्ड्स कुनै समय नेपालकै हाराहारीको टिम हुन । अझ भनौं नेपालले कुनैबेला यी देशलाई हराइसकेको छ । तर अहिलेको अवस्थामा उनीहरुको स्तर नेपालको भन्दा निकै माथि पुगिसकेको छ । अब नेपाली क्रिकेटको स्तरलाई दुई गुणा बढाउनका लागि क्यानले बनाउने रोडम्याप नै टिमका लागि कोशेढुंगा बन्नेछ ।
तर त्यसका लागि क्यानले बनाउने योजनामा होष्टेमा हैसे गर्नका लागि राष्ट्रिय खेलकुद परिषद्का साथै सरकारले नै साथ दिनुपर्नेछ । यो बाहेक निजी क्षेत्रको लगानी निकै महत्वपुर्ण रहनेछ ।
