नेपाल सुपर लिगको दोस्रो सिजन खेल्न अष्ट्रेलियाबाट आएका डिफेन्डर दिनेश राजवंशी प्रहरी हिरासतमा परेका छन ।

एनएसएलको पोखरा थन्डर्सले शुक्रबार दिनेशलाई नेपालमा स्वागत गरेको थियो । त्यसयता केहि दिन क्लबसँगै प्रशिक्षण गरेका दिनेशले राष्ट्रिय टोलीविरुद्ध भएको मैत्रीपूर्ण खेलमा पनि सभागिता जनाएका थिए । तर त्यसपछि उनी क्लबको प्रशिक्षणमा सहभागी थिएनन् ।

स्रोतका अनुसार दिनेशसहित ४ जनालाई प्रहरीले नियन्त्रणमा लिएको थियो । बुधबार राती दरबारमार्ग क्षेत्रमा उनीहरुले अभद्र व्यवहार गरेको आरोप रहेको छ । दिनेश हाल प्रहरी वृत्त दरबारमार्गको हिरासतमा रहेको प्रहरी स्रोतले जानकारी दियो ।

दिनेशसहित ४ जानमाथि अभद्र व्यवहारको मुद्दा परेको छ । थप अनुसन्धानका लागि हिरासतमा राखेर अनुसन्धान गर्न विहीबार अदालतले ७ दिनको म्याद थप गरिसकेको छ । उनी अब कम्तिमा अर्को सातासम्म प्रहरी हिरासतमै रहने भएका छन् ।

दिनेश यसअघि राष्ट्रिय टोलीमा रहँदा अनुशासन तोडेको कारण एन्फाको कारवाहीमा पनि परेका थिए । ४ वर्षअघि दिनेशसहित ४ खेलाडीले राष्ट्रिय टोलीको क्याम्प छोडेर बाहिर गएका कारण एन्फाले कारवाही गरेको थियो । त्यसबेला दिनेशले राष्ट्रिय टोलीबाट बाहिर रहनुका साथै १३ औं दक्षिण एसियाली खेलकुद र ए डिभिजन लिगमा पनि केहि खेल गुमाएका थिए ।