अस्तित्व, ब्रह्माण्ड, जीवन, समय र समाजका आफ्नै अन्तर्दृष्टिका गहन चिन्तनदर्शनका कविता लेख्ने प्रखर कवि आर.बी. निश्चलको सातौँ काव्य कृतिको रुपमा “ब्रह्माण्डको अन्त्य” प्रकाशन हुने भएको छ । प्रकाशोन्मुख उक्त कृतिमा तीन खण्डमा ७२ कविता समेटिएको कविले जानकारी दिनु भएको छ ।
यसअघि कवि निश्चलका ‘मौन हिमाल, ‘सपनाफूल, ‘आँसु खस्दै गर्छ, ‘पैताला पुकार, ‘किस्ताकिस्तामा जिन्दगी र ‘उल्टो धार काव्यकृतिहरू प्रकाशित भइसकेका छन् ।
प्रकाशक संस्था इम्प्रिन्टका रमेश घोरासैनी भन्छन्—" ब्रह्माण्डको अन्त्य कवितासङ्ग्रहमा कविको अनन्त कल्पनाको उडान देख्न त पाइन्छ नै ! साथै, अस्तित्वका बारेमा निश्चलका आफ्नै धारणा र अनेकौँ काल्पनिक प्रश्न तथा उत्तर— 'के ब्रह्माण्डको अन्त्य हुन्छ ?' 'हुन्छ भने केकसरी हुन्छ/कस्तो हुन्छ ?' 'ब्रह्माण्डको अन्त्य हुनु के अस्तित्वको पनि अन्त्य हुनु हो ?' सँग गज्जबसँग साक्षात्कार गर्न सकिन्छ ।
पुस्तकको बारेमा राजकुमार बानियाँ लेख्छन्— " आर.बी. निश्चलको नवीनतम कविताकृति 'ब्रह्माण्डको अन्त्य' समसामयिक नेपाली कवितामा देखिएको एउटा उत्तेजक विस्फोट हो । "
समय र अस्तित्व अनि जीवन र परिवेशको गहिरो प्रतिध्वनिलाई कवि रुपकमार्फत निरन्तर प्रश्न गर्छन्— मानिस कहाँ सकिन्छ, पीडा कहाँ समाप्त हुन्छ र अन्त्यको भावना कहिले जन्मिन्छ ?
यहाँ ‘अन्त्य कुनै विनाशको घोषणा वा भविष्यवाणी होइन; अस्तित्वको जटिल स्वरुपलाई बुझ्ने एउटा मानसिक अवस्थामात्र हो । यी कविताहरूले अन्त्यको कथा भन्दैनन्; बरू अन्त्यलाई बुझ्ने हाम्रो क्षमतालाई नै चुनौती दिन्छन् । मानवीय अनुभूति र संवेदनाहरूको काव्यिक दस्तावेज बनेका यी कवितामा कवि–मनको सूक्ष्म कम्पन तथा प्रतिकम्पनहरू समेटिएका छन् ।
यो केवल कवितासङ्ग्रह मात्र होइन, मानव अस्तित्त्वको सीमारेखामा उभिएको एक तीव्र आत्म–अन्वेषण पनि हो । अस्तित्ववादी दृष्टिले “ब्रह्माण्डको अन्त्य” आफैंलाई बुझ्न खोज्दा आफूबाटै टाढिंदै गएको मानवीय विडम्बनाबोध हुन्छ । यी कविता ‘अस्तित्व र ‘अर्थ बीचको सङ्घर्षमा जन्मिएका हुन् । यी कविताले कुनै उत्तर दिनुको सट्टा पाठकभित्र नयाँनयाँ प्रश्न उमारिदिन्छन् ।
वास्तवमा ब्रह्माण्ड बाहिर छैन, आफैंभित्रै छ । ब्रह्माण्ड भौतिक परिधिभन्दा पनि ज्यादा आत्म–परिधि हो । कविता पढ्दा–पढ्दै बुझिन्छ— अन्त्य ‘अन्त्य हुने कुरामा होइन; ‘अन्त्यको बोधमा हुन्छ र, यही सुन्दर बोधले सम्पूर्ण कवितालाई दार्शनिक उचाइमा पुर्याउन सघाएको छ ।
कवितासङ्ग्रह दशैँअघि बजारमा ल्याउने तयारी रहेको प्रकाशकबाट जानकारी आएको छ ।
